Articles

Thursday, 08 November 2018

ဘဝမှာ လုပ်ချင်တာနဲ့ လုပ်သင့်တာ.. ဘယ်အရာကို ရွေးချယ်သင့်လဲ...

ဒီလို အခြေအနေမျိုးကို လူတော်တော်များများရဲ့ဘဝမှာ ကြုံကြိုက်ဖူးကြလိမ့်မယ်။ အထူးသဖြင့် ဘဝကို အကောင်းမွန်ဆုံး တည်ဆောက်ချင်တဲ့ သူတွေရဲ့ဘဝမှာ ကြုံဖြစ်လိမ့်မယ်။

ဒီလို အခိုက်အတန့်ကျရင် လူတွေ အင်မတန်ကြောက်ကြတယ်။ တစ်ခုခု ရွေးချယ်မှု မှားယွင်းသွားရင်.. ခံစားရမှာ.. နာကျင်ရမှာ.ပြီးတော့ အဆိုးဆုံးက နောင်တရကြမှာကို ကြောက်ကြတယ်။

ဒီတော့ သိမယ်ထင်တဲ့သူ.. တတ်မယ် ထင်တဲ့သူ.. ကိုယ် အားကိုးလို့ရမယ့်သူ.. စသဖြင့် ဆိုင်ရာဆိုင်ရာလူတွေကို အားကိုတကြီး မေးကြ တယ်။

"လုပ်သင့်တာနဲ့ လုပ်ချင်တာ.. ဘာကို ရွေးရမလဲ" ဆိုပြီးတော့ပေ့ါ။

ဒီလို မေးတာ.. အကြံဥာဏ်တောင်းတာတွေက မှားတယ်လို့တော့ မပြောပါဘူး။ ဒါပေမယ့် သူကြုံခဲ့တဲ့ ဘဝနဲ့ ကိုယ် ကြုံနေရတဲ့ ဘဝဟာ တူချင်မှ တူမယ်။ တွေ့ကြုံဖြတ်သန်းခဲ့ရတဲ့ ဘဝတွေ မတူတဲ့အခါ သူဖြေတဲ့အဖြေကလည်း ကိုယ်နဲ့ အံဝင်ခွင်ကျ ဖြစ်ချင်မှဖြစ်မယ်..။

ဘဝမှာ ဖြစ်ချင်တဲ့အရာကို လုပ်ပြီး အောင်မြင်နေတဲ့သူတွေလည်း ရှိမယ်...။ ဖြစ်သင့်တဲ့အရာကို လုပ်ပြီး အောင်မြင်နေတဲ့သူတွေလည်း ရှိမယ်..။ သေချာတာက သူတို့အချင်းချင်းမှာလည်း ဖြတ်သန်းခဲ့တဲ့ ဘဝတွေ မတူဘူး..။ သူတို့ဘဝနဲ့ ကိုယ်ဖြတ်သန်းရမယ့် ဘဝနဲ့ကလည်း မတူဘူး။

ဒီတော့ "လုပ်သင့်တာနဲ့ လုပ်ချင်တာ" ဘာရွေးရမလဲ ဆိုတဲ့ မေးခွန်းမျိုးက တခြားသူကို မေးရမှာ မဟုတ်ဘူး..။ ကိုယ့်ကိုယ်ကို မေးရမှာ။ ကိုယ့်ဘဝကိုယ် သေချာနားလည်အောင်ကြည့်ပြီး မေးရမယ့် မေးခွန်း။

ကိုယ့်ဘဝဟာ ကိုယ်လုပ်ချင်တာတွေ.. ဖြစ်ချင်တာတွေကို ဖန်တီးခွင့်ရမယ့် အနေအထားမျိုး၊ အခွင့်အလမ်းမျိုး ရှိနေလားလို့ ကိုယ့်ကိုယ်ကို ပြန်မေး။ ဒီလို အနေအထား၊ အခွင့်အလမ်း ရှိနေတယ်ဆိုရင်တော့ ဖြစ်ချင်တာကိုသာ ဦးစားပေးလုပ်လိုက်ပါ။ လူဆိုတာ ကိုယ်စိတ်အား ထက်သန်တဲ့ အရာကို လုပ်တဲ့အခါ ပိုပြီးတော့ အောင်မြင်နိုင်တယ်။

ဒီလို အနေအထား၊ အခွင့်အလမ်းမရှိဘဲ ဖြစ်ချင်တာကိုပဲ လုပ်မယ်ဆို သိပ်စွန့်စားရာကျသွားမယ်။ ဒီလို အခြေအနေဆိုရင်တော့ လုပ်သင့်တာကိုပဲ အရင်လုပ်လိုက်ပါ။

ဒါပေမယ့် လုပ်သင့်တာပဲ လုပ်ရင်းနဲ့ ဘဝကိုငြီးငွေ့စရာအဖြစ်နဲ့ အဆုံးမသတ်လိုက်ပါနဲ့။ ကြိုးစားရင်းနဲ့ တစ်ချိန်မှာ ကိုယ်ဖြစ်ချင်တာတွေ.. လုပ်ချင်တာတွေကို လုပ်နိုင်ဖို့ အခွင့်အလမ်းတွေ ပေါ်လာပါလိမ့်မယ်။

ဒီလို အခွင့်အလမ်းမျိုး ကြုံလာတဲ့အခါ ရင်ထဲကဆန္ဒအတိုင်း လုပ်လိုက်ပါ။ ဘဝဟာ တစ်ကြိမ်တစ်ခါပဲရတဲ့ အရာမျိုးဖြစ်လို့ ကိုယ်လုပ်ချင် တာကိုတော့ လုပ်လိုက်ဖို့ သင့်ပါတယ်။

source: ရွှေညာမောင် (Focus Youth)

Read 509 times Last modified on Thursday, 08 November 2018 10:52
Rate this articles
(1 Vote)