”ကျွန်တော်နဲ့ အပျော့အမာ ”
ကျွန်တော်ဟာ အခါအခွင့်ရတိုင်း စာသင်တယ်။ ဟောပြောပွဲတွေ လုပ်ပေးတယ်။ တက္ကသိုလ်ကျောင်း တွေမှာ လုပ်ခဲ့သလို အပြင်လည်းလုပ်ပေးခဲ့တယ်။ အမှန်တော့ အခုလိုမျှဝေရင်း တက်ရောက်လာ သူတွေရဲ့ အသိတရားကို မြင့်မားစေချင်တယ်။ ကျွန်တော့်ရဲ့ ပညာရပ်ဟာ စီမံခန့်ခွဲမှုမို့ အသိတရားတိုးရုံမဟုတ်ဘဲ အတတ်ပညာကိုလည်း ရစေချင်တယ်။ လွယ်လွယ်ပြောရရင် သိခြင်းနဲ့ တတ်ခြင်းကို အားပေးချင်တာ။ တချို့က သိပေမယ့် မတတ်ကြဘူး။ တချို့ကျတော့လည်း တတ်ပေမယ့် မသိကြပြန်ဘူး။ ဒါကြောင့် အသိနဲ့ အတတ်ကို တွဲဖက်နေစေချင်တယ်။ တစ်ခုတော့ ရှိတယ်။ သိရုံတတ်ရုံနဲ့ မလုံ လောက်ပြန်ဘူး။ ဆန္ဒပါမှ ဖြစ်တာ။ ဒါကြောင့် အသိအတတ်နဲ့ ဆန္ဒပေါင်းစပ်ဖို့လိုတယ်။ စိတ်မပါရင်ဘယ်လောက်သိသိ၊ ဘယ်လောက် တတ်တတ်၊ အလကားပဲ။ ဆန္ဒကိုတော့ ကျွန်တော် မလုပ်ပေးနိုင်ဘူး။ မပို့ချနိုင်ဘူး။ သင်ယူခံယူတဲ့သူရင်ထဲမှာ ပေါ်လာမှဖြစ်တယ်။
အပျော့နဲ့အမာ
အသိအတတ်နဲ့ ဆန္ဒကို ပုံစံတစ်မျိုးနဲ့ သုံးတယ်။ အသိ ဆိုတာက ဦးခေါင်းကို အာရုံပြုတာ။ အတတ်က တော့ လက်တွေ့ ကို ဦးစားပေးပြီး ဆန္ဒကတော့ နှလုံးသားကို နှိုးဆွတာ။ ဒါကြောင့် ကျောင်းဆရာ တစ်ယောက်အနေနဲ့ တပည့်တွေရဲ့ ဦးနှောက်ရယ်၊ တပည့်တွေရဲ့ လက်တွေ့ရယ်၊ တပည့်တွေရဲ့ နှလုံးသားတွေကို ထိတွေ့နိုင်အောင် အမြဲကြိုးစားပါတယ်။
Read More >>>>> လူက သခင်လား? နည်းပညာက သခင်လား?
အသိအတတ်နဲ့ ဆန္ဒကို ပုံစံတစ်မျိုးနဲ့ သုံးသပ်ရင် အမာနဲ့ အပျော့လို့ ခွဲခြားနိုင်တာ။ တတ်တာက အမာဖြစ်ပြီး သိတာနဲ့ ဆန္ဒကအပျော့လို့ ယူဆနိုင်တယ်။ ဆေးပညာပဲဖြစ်ဖြစ်၊ အင်ဂျင်နီယာ ပညာပဲဖြစ်ဖြစ်၊ စာရင်းကိုင်ပညာပဲဖြစ်ဖြစ် ပညာရပ်တိုင်းမှာ အတတ်ကို ဦးစားပေးတယ်။ တစ်နည်းပြောရင်အမာကို ဇောင်းပေးတယ်။ ပညာရပ်နဲ့ပတ်သက်ပြီး ပြီးပြည့်စုံအောင် တတ်ဖို့လိုကြောင်း ဆုံးမတယ်။ ဒါကြောင့် လည်း တက္ကသိုလ်၊ ကောလိပ်ကျောင်းတွေမှာ အမာတွေကို ဖိသင်တယ်။
အမာဟာ အရေးကြီးတယ်။ ဒါကိုတော့ ငြင်းလို့မရပါဘူး။ ခွဲစိတ်ပညာမတတ်ဘဲနဲ့ ခွဲစိတ်ဆရာဝန် မဖြစ်နိုင်ဘူး။ ဗိသုကာပညာ မကျွမ်းကျင်ဘဲ အင်ဂျင်နီယာမဖြစ်နိုင်ဘူး။ ဥပဒေပညာ မကျွမ်းကျင်ဘဲ ရှေ့နေတရားသူကြီးမဖြစ်နိုင်ဘူး။ ဒါပေမယ့် ဆေးပညာ ထူးချွန်ပေမယ့် ဆက်ဆံရေးအားနည်းရင် လူနာတွေရှိမှာ မဟုတ်ဘူး။ ဥပဒေပညာ ကျွမ်းကျင်ပေမယ့် အမှုသည် တွေနဲ့ အဆင်ပြေအောင် မဆက်ဆံ နိုင်ရင် အမှုသည်ရမှာ မဟုတ်ဘူး။ ခက်တာက အပျော့ပညာကို ဘယ်တက္ကသိုလ်၊ ဘယ်ကောလိပ်မှ မသင်ပေးဘူး။ သင်ပေးဖို့လိုအပ်ကြောင်းကု လက်မခံဘူး။ သိတောင်မသိဘူး။ ဒါကြောင့်လည်းပညာမှာ ထူးချွန်ပေမယ့် အလုပ်မှာ မအောင်မြင်တဲ့သူတွေ အများကြီး ရှိနေတာ တွေ့ရတယ်။ ကျွန်တော်ကတော့ တစ်ဖက်က အမာ တွေ သင်သလို တစ်ဖက်က အပျော့တွေ သင်စေချင်တယ်။
အပျော့ကို ပျော့ညံ့မှုလို့ထင်ကြ
ဒါပေမယ့် အပျော့လို့ပြောရင် လူတွေက အထင်သေးတယ်။ ပျော့ညံ့မှုနဲ့ ယှဉ်တွဲတယ်။ ငယ်ငယ်ကတည်းက ကလေးတွေကို မာဖို့သင်တယ်။ စိတ်ဓာတ်ခိုင်မာရမယ်။ ပျော့ညံ့တာဟာ မကောင်းဘူးဆိုပြီး ရိုက်သွင်းခဲ့ တယ်။ အမှန်တော့ အမာတွေက သင်ရတာလွယ်ပြီး အပျော့က သင်ရတာခက်တယ်။ ကျွန်တော်က စီးပွားရေး လုပ်ငန်းရှင်များကို အပျော့ပညာ သင်ပေးတယ်။ အရေးကြီးဆုံး အပျော့ပညာက EQ လို့ ခေါ်တယ်။ ခံစားမှုနဲ့ပတ်သက်ပြီး ဉာဏ်ရည်ထက်မြက်ဖို ဖြစ်တယ်။ ကလေးတစ်ယောက်ကို တော်တယ် လို့ပြောရင် ဉာဏ်ရည်ထက်မြက်မှုကို ရည်ညွှန်းတာ။ တစ်နည်းပြောရင် IQ မြင့်သူလို့ ပြောတာ။ ဒါပေမယ့် စာတော်တိုင်း ဘ၀မှာ မအောင်မြင်ကြဘူး။ ဒါကြောင့် လူတစ်ယောက်မှာ IQ ဟာ အရေးပါသလို EQ ဟာ အရေးကြီးကြောင်း အသိအမှတ် ပြုလာကြတယ်။ EQ ရဲ့ အခြေခံက ကိုယ့် အကြောင်းသိခြင်း ဖြစ်တယ်။ လူတွေက ကိုယ့်အကြောင်းကို သိတယ်လို့ထင် ပေမယ့် အမှန်တော့ အပြည့်အဝမသိနိုင်ပါဘူး။ အခုလို ကိုယ့်အကြောင်းကိုသိတဲ့ အခြေခံကတစ်ဆင့် ကိုယ့်ကိုယ်ကို ထိန်းသိမ်း နိုင်စွမ်းရှိရမယ်။ တစ်ဖက်က ကိုယ့်အကြောင်း ကိုသိအောင် ကြိုးစားသလို သူများအကြောင်း သိနိုင်အောင် လည်း အားထုတ်ရမယ်။ ဒါမှ ဆက်သွယ်ဆက်ဆံရေးပြေလည် နိုင်မှာသာဖြစ်တယ်။
သူ့နေရာမှာနေကြည့်နိုင်တဲ့ သတ္တိရှိဖို့လို
ကိုယ်ချင်းစာတရားဟာ EQ ရဲ့ အနှစ်သာရပဲ။ လူတွေ ဟာ အတ္တသမားတွေ ဖြစ်ကြတယ်။ ဒါပေမယ့် တစ်ဖက်သား အတွက်လည်း စဉ်းစားရမယ်။ ကိုယ်ချင်းစာတရားရှိရမယ်။ သူ့နေရာမှာနေကြည့်နိုင်တဲ့ သတ္တိရှိရမယ်။ ကျွန်တော် စိတ်မကောင်းဖြစ်မိတာက အခုချိန်မှာ ကိုယ်ချင်းစာစိတ်တွေ ခေါင်းပါးနေတာ တွေ့ရတယ်။ တစ်ဖက်သတ် အစွန်းတရားကို လက်ခံနေကြတယ်။ အမုန်းတရားတွေနဲ့ အရာရာကို ဖြေရှင်း ချင်ကြတယ်။ ကိုယ့်ဘက်က မှန်သလို သူ့ဘက်ကလည်း မမှား ဘူးဆိုတာကို လက်ခံနိုင်ရမယ်။ အခုတော့ သုညကြွင်းတဲ့ ကစားပွဲကို ကစားနေကြတယ်။ “ငါနိုင်ဖို့ မင်းရှုံးရမယ်” ဆိုတဲ့ အယူအဆက လွှမ်းမိုးနေတာ။ “ငါလည်း နိုင်တယ်၊ မင်းလည်း မရှုံးဘူး” ဆိုတာမျိုး စဉ်းစားဖို့လိုတယ်။
EQ နဲ့ ပတ်သက်ရင် ပညာရှင်အချို့က အပိုင်းနှစ်ပိုင်းနဲ့ ဖော်ပြကြတယ်။ ပထမပိုင်းကတော့ ကိုယ့် အကြောင်းကို သိခြင်းဖြစ်တယ်။ စောစောက ပြောခဲ့တဲ့အတိုင်း ဒုတိယအပိုင်းက ကိုယ့်ကိုယ်ကိုယ် ရွေးချယ်ခြင်းဖြစ်တယ်။ အရာရာကို မိမိဆန္ဒအရ ရွေးချယ်မှုဖြစ်သင့်တယ်။ သူများနဲ့မဆိုင်ဘူး။ အောင်မြင်မှုမရှိရင် ကိုယ့်ကြောင့်ပဲ။ မိမိရဲ့ရွေးချယ်မှုမှားယွင်း လို့ဖြစ်တယ်ဆိုတာကို လက်ခံရမယ်။ လက်ရှိဖြစ်နေတဲ့ အခြေအနေဟာ ကိုယ့်ရဲ့ရွေးချယ်မှုကြောင့်ဖြစ်တယ်ဆိုတာ ဝန်ခံရဲရမယ်။ နောက်ဆုံးက တော့ ပေးဆပ်ခြင်းဖြစ်တယ်။ ဘ၀ဟာ ရယူခြင်းမဟုတ်ဘဲ ပေးဆပ်ခြင်းဖြစ်တယ်။ ဒါကြောင် အလုပ် လျှောက်တဲ့လူငယ်တွေကို ကျွန်တော်က အမြဲအားပေးတယ်။ ဒီအလုပ်ရရင် လခဘယ်လောက်ရမလဲ၊ ဘာအခွင့်အရေးတွေ ရမလဲဆိုတာ မမေးဘဲ၊ မစဉ်းစားဘဲ ကိုယ်က ဘာပေးဆပ် ရမလဲ၊ ဘာလုပ်ပေးရ မလဲဆိုတာကို အာရုံပြုရမယ်။
အရေးကြီးတာက နားထောင်ဖို့
လူတွေဟာ တစ်ယောက်တည်း နေလို့မရပါဘူး။ အပေါင်း အသင်း၊ လုပ်ဖော်ကိုင်ဖက်တွေ၊ မိသားစုတွေနဲ့ ထိတွေ့ဆက်ဆံ ရတယ်။ အခုလို ဆက်ဆံတဲ့အခါမှာ အရေးကြီးဆုံးက အပြောအဆိုနဲ့ နားထောင်မှု ပဲဖြစ်တယ်။ ဆက်သွယ်ရေး အားနည်းမှုကြောင့် နားလည်မှုပျက်ပြားတယ်။ နားလည်မှုလို့ ပြောရင် တူညီတဲ့နားလည်မှုကို ဆိုလိုတာ။ နားလည်မှု အားနည်းနေတာကြောင့် မိသားစု၊ အဖွဲ့အစည်း၊ နိုင်ငံမှာ မလိုအပ်တဲ့ပြဿနာတွေ ပေါ်နေတယ်။
နားလည်မှုမြင့်မားဖို့ အရေးကြီးတာက နားထောင်ဖို့ ဖြစ်တယ်။ အမှန်တော့ နားထောင်တာဟာ မလွယ်ကူလှဘူး။ သူများပြောနေတာကို နားထောင်နေပေမယ့် စိတ်က တခြား၊ ပြောတာကို တစ်ဝက် လောက်ပဲကြားတာ။ နားထောင်တာ မဟုတ်ဘဲ ကိုယ့်အလှည့်ကျရင် ဘာပြောရမလဲဆိုတာကို စာစီနေကြ တယ်။ ဒါကြောင့်လည်း နားလည်မှုတွေ အားနည်းနေတာ။
တချို့က နားထောင်တဲ့ အင်အားသိပ်နည်းတယ်။ ကိုယ်ကပဲ ပြောချင်တာ။ သူများပြောတာ ကို နားထောင် ရမှာ စိတ်မရှည်ဘူး။ အားလုံးသိနေတယ်လို့ ထင်တယ်။ ဒါကြောင့် ကျွန်တော်က အစည်းအဝေးတွေမှာ ၈၀ ရာခိုင်နှုန်း နားထောင်ပြီး ၂၀ ရာခိုင်နှုန်းပြောဖို့ သတိပေးခဲ့တာ။ အစည်းအဝေး တစ်နာရီကြာရင် ၄၈ မိနစ် နားထောင်ပြီး ကျန်တဲ့ ၁၂ မိနစ်လောက်သာ ပြောစေချင်တယ်။
အခုတော့ ပြောင်းပြန်ဖြစ်နေတာ။ တစ်နာရီမှာ မိနစ် ၆၀ လောက် ပြောချင်တာ။ ကျန်တဲ့သူပြောတာကို နားထောင်စွမ်းမရှိ ဘူး။ ဒါကြောင့် လည်း နားလည်မှုတွေ လျော့ပါးနေတာ။ ကျွန်တော်ပြောတဲ့ ပုံသေနည်းကိုသုံးရင် အခြေအနေ တွေချက်ချင်း ပြောင်းနိုင်တယ်။ ဆက်သွယ်မှုဟာ အရေးကြီးသလို ပူးပေါင်းဆောင်ရွက်မှု ဟာလည်း အရေးကြီးတယ်။ အားလုံးကို ကိုယ်တစ်ဦးတည်း တစ်ယောက်တည်းလုပ်လို့ မဖြစ်နိုင်ဘူး။ ကိုယ်နဲ့အတူ ဝိုင်းဝန်းဆောင်ရွက်မယ့်သူတွေနဲ့ ပူးပေါင်း ရမယ်။ တစ်ကိုယ်တော်လုပ်တာဟာ ပင်ပန်းတယ်။
နှိမ့်ချမှုဟာ အရေးပါတဲ့အပျော့ပညာ
ပူးပေါင်းဆောင်ရွက်ဖို့ အပေးအယူရှိရမယ်။ တစ်ဦးချင်းမှာရှိတဲ့ အရည်အချင်းတွေကို အသုံးချနိုင်ဖို့ လိုတယ်။ ကိုယ့်ထက်တော်တဲ့သူတွေ၊ ကိုယ့်ထက်တတ်တဲ့သူတွေ အနားမှာရှိဖို့ အရေးကြီးတယ်။ ကိုယ့်နေရာကို အချိန်မရွေး အစားထိုးနိုင်သူတွေကို ရွေးချယ်ထားဖို့ လိုအပ်တယ်။ နှိမ့်ချမှုဟာလည်း အရေးပါလှတဲ့ အပျော့ပညာဖြစ်တယ်။ ကိုယ်မသိသေးတာ၊ မတတ်သေးတာကို လက်ခံနိုင်ရမယ်။ ကိုယ့်ထက်တတ်တဲ့သူတွေ၊ သိတဲ့သူတွေရှိတာကို အသိ အမှတ်ပြုရမယ်။ နှိမ့်ချလို့ နိမ့်ကျတာ မရှိပါဘူး။
ကျွန်တော်က လူငယ်တွေရဲ့ သင်ယူခံယူမှု အမြဲအားပေးတယ်။ မသေမချင်း လေ့လာကြပါ၊ သင်ယူကြ ပါလို့ တိုက်တွန်းတယ်။ ဘ၀မှာသိစရာ၊ တတ်စရာ၊ သင်စရာတွေအပြည့်။ မကုန်နိုင်ဘူး။ ဒါကြောင့် မရပ်စေ ချင်ဘူး။ ပညာလောဘရှိစေချင်တယ်။ ဒါပေမယ့် အခုလို ပညာများများ တတ်လေလေ အများအတွက် ဘယ်လိုအလုပ်အကျွေးပြု ရမလဲဆိုတာကို အမြဲစဉ်းစားစေချင်တယ်။ အမှန်တော့ လူတစ်ယောက်ရဲ့ တန်ဖိုးဟာ အများအတွက် ဘာလုပ်ပေးနိုင်မလဲဆိုတဲ့ ပေတံနဲ့တိုင်းစေချင်လှတယ်။ ။
ပါမောက္ခ ဒေါက်တာ အောင်ထွန်းသက်
Source: Phoewa
